PONTEAREAS PRESENTA ESTA FIN DE SEMANA A MARCA TEXTIL E OS CHOCOLATES “VILA DO CORPUS”

PONTEAREAS PRESENTA ESTA FIN DE SEMANA A MARCA TEXTIL E OS CHOCOLATES “VILA DO CORPUS”

  • O comercio local poderá vender en exclusiva prendas téxtiles bordadas coa marca Vila do Corpus
  • A hostalaría disporá de chocolates Vila do Corpus para vender ou agasallar a súa clientela

Ponteareas, 30 de maio de 2024.-  Proporcionar novos recursos para o comercio e a hostalaría local e promover a festa do Corpus Christi e o nome de Ponteareas son os obxectivos principais da creación da marca de merchandising de produtos téxtiles e chocolates Vila Do Corpus.

A alcaldesa, Nava Castro, e o concelleiro de Comercio, Ricardo González, mantiveron un encontro coas e cos comerciantes e hostaleiros locais para presentarlles a marca que o Concello vén de rexistrar, Vila do Corpus. Unha marca baixo a que se producirán e comercializarán distintos produtos textiles, chocolates e de merchandising que o comercio local e a hostalaría poderán vender ou agasallar.

Esta nova liña de produtos Vila de Corpus presentarase á cidadanía e visitantes esta fin de semana nun stand que se ubicará na contorna do Concello próxima aos tramos alfombristas.

No posto Vila de Corpus poderemos ver as primeiras pezas que comezará a vender de xeito exclusivo o comercio local nos vindeiros meses. A marca lanzará unha liña téxtil con polos, camisetas e sudadeiras de algodón bordados con logotipo da marca, unha homenaxe ás alfombras florais do Corpus Christi de Ponteareas. Ademais, haberá produtos doces como as chocolatinas que dan a coñecer ás e aos nosos ponteareáns ilustres, Rogelio Groba, Reveriano Soutullo e outros. Tamén haberá un formato de tableta de chocolate artesá dun quilo que o Concello agasallará aos portais alfombristas nun xesto de complicidade deses moitos chocolates á taza que comparten nas noites de traballo nos portais. O Concello entregou tamén delantais bordados coa marca Vila de Corpus ás e aos hostaleiros no transcurso do encontro de presentación da marca.

Agora, comerciantes, hostaleiros e goberno de Ponteareas deseñarán unha estratexia conxunta e consensuarán as accións de produción, distribución e promoción máis axeitadas para que saia á venda o antes posible.

“Cos produtos Vila do Corpus ofrecemos un recurso exclusivo que contribúe a dinamizar a economía local, que promove o coñecemento do noso comercio e hostalaría que xera, tamén, unidade e sentimento”, explica a alcaldesa.

Pola sua banda, Ricardo González, adianta que nas vindeiras semanas avaliarán, tendo en conta as aportacións das e dos profesionais locais, o proceso que máis responda ás necesidades de todas e todos.

Anterior O CORPUS CHRISTI DE PONTEAREAS ESTREARÁ A SÚA PROPIA MARCHA PROCESIONAL, CREACIÓN DE XOSÉ LOIS FOXO

Este sitio web utiliza cookies para que teñas a mellor experiencia de usuario. Se continúas navegando estás dando o teu consentimento para aceptar as mencionadas cookies e a aceptación da nosa política de cookies, prema na ligazón para obter máis información.

ACEPTAR
Aviso de cookies